නෙම කෙනෙක් රැකියාවකට යන්නේ ගොඩක් ඉහල අරමුණු සහ අපේක්ෂාවන් තියාගෙනයි. නමුත් ඔබ නොදැනුවත්කමට සිදු කරන වැරදි නිසා ඔබේ ආයතන ප්‍රධානියා සමඟ ඇති ඔබේ හොඳ හිත නැති වෙලා යන්න පුළුවන්. ඔබේ ආයතනය තුල ඔබට ඉහලට යන්නට නම් සෙසු පුද්ගලයන් සමඟ ඇති සබඳතාවය රැක ගැනීම වැදගත් වෙනවා. ඉතින් අද අපි මේ ගැන ලිපියක් ඔබ වෙත ඉදිරිපත් කරන්නට තීරණය කළා.



1 පුරුද්දක් ලෙස ආයතනය නිම වීමට පෙර පිට වීම

හදිසි අවස්ථා වලදී ඔබට ආයතනය නිම වීමට පෙර පිටව යාමට අවශ්‍ය නම්, ඒ සඳහා අනුගමනය කල යුතු නියමිත ක්‍රමවේදයක් තිබෙනවා. එහෙම නැතුව පුරුද්දකට වගේ හැමදාම කලින් යන්න තියා ගත්තොත් නම් ඔබේ කාර්යාලිය සගයන්ටත්, ඔබේ ආයතන ප්‍රධානියාටත් ඔබව එපා වෙන්න පුළුවන්. ඔබ හිතනවා ඇති ඔබ ඔබේ කල යුතු රාජකාරි ඉවර කරලයි පිටත් වෙන්නේ කියලා. නමුත් එයින් අන් අය වෙත වැරදි සංඥා කීපයක්ම නිකුත් වෙනවා. ඔබ ඔබේ රාජකාරි උවමනාවකින් තොරව නොසැලකිලිමත් ලෙස කරන බව හෝ ඔබට ලබා දෙන රාජකාරි ප්‍රමාණය මදි බව හෝ ඔවුන්ට දැනෙන්නට පුළුවන්.

 

2 ඔබේ විදිහටම කරන්නට යාම

සමහරු ඉන්නවා අලුතින් දෙයක් ඉගෙන ගන්න, තව කෙනෙක් කියන දෙයකට අවධානය යොමු කරන්න හරිම අකමැතියි. මේ කට්ටිය වැඩ කරන්නේ තමන් දන්නා එකම ක්‍රමය අනුගමනය කරමිනුයි. සමහරවිට තමන් වැඩ කරන ක්‍රමවේදයට වඩා පහසු, ඉක්මන් සහ ඵලදායි ක්‍රමවේදයන් ගැන අන් අය දැනුම් දුන්නත්, ඔවුන්ට තමන් දන්නා ක්‍රමවේදයෙන් මිදෙන්නට බැහැ. එතකොට අනිත් අයට ඔබේ වැඩ රුස්සන්නේ නැතිව යනවා. මේ නිසා යමක් කරනකොට අනිත් අයගේ උපදෙස් වලටත් කන් දීලා, ඔබේ අදහසුත් ඔවුන්ට කියලා, වඩාත් සුදුසුම ක්‍රමය තෝරාගෙන වැඩ කරන්න.

 

3 රාජකාරියෙන් බාහිර වැඩ ප්‍රතික්ෂේප කිරීම

ඔබව ඔබේ ආයතනයෙන් බඳවා ගන්නේ නිසි රාජකාරියකට බව අත්තක්. නමුත් හදිසි අවස්ථා වලදී අපිට වැඩ බෙදාගෙන කරන්න සිදු වෙනවා. ඔබේ සගයෙකුට හදිසි කරදරයක් නිසා නිවාඩු ගන්නට වුවොත් ඒ වැඩ බෙදාගෙන කරන්නට ඔබට සිදු වෙන්න පුළුවන්. ඔබ කරන රාජකාරියට වඩා ගොඩක් හදිසි රාජකාරියක් ඔබේ ප්‍රධානියා ඔබට පවරන්නේ නම් එය ප්‍රතික්ෂේප කරන්න එපා. ආයතනයක් කියන්නේ කණ්ඩායමක්. ඔබේ වැඩේ විතරක් කරගෙන, පාඩුවේ ඉන්න එක නම් එච්චර හොඳ මදි.

 

4 අනුන් පිට වැරදි පැටවීම

ඔබේ අතින් යම් අතපසු වීමක් සිදු වෙලා නම් නිහතමානිව එය භාර ගන්න. ඔබේ වැරදි අඩුපාඩු අනිත් අය පිට පටවන්නට යාම නිසා සිදු වන්නේ සිත් බිඳීම් ඇති වීම පමණයි. ඔබේ ආයතන ප්‍රධානියා ඔබේ පැත්ත ගනීවි කියලා ඔබ හිතනවා නම් එය වැරදියි.

ඒ වගේම අනිත් අයගේ අඩුපාඩු ඔබේ ප්‍රධානියාට දැනුම් දීමත් නුසුදුසුයි. ඔබේ ආයතන ප්‍රධානියා අනුන්ගේ අඩුපාඩු ගැන සෙවීමට ඔබව යොදා ගන්නවා වෙන්න පුළුවන්. නමුත් එහි අදහස ආයතන ප්‍රධානියා අනිත් සේවකයන්ට වඩා ඔබව විශ්වාස කරන බව නෙවෙයි. එහි සැබෑ අදහස අන් අයගේ තොරතුරු ලබා ගැනීමේ මාධ්‍යයක් ලෙස ඔබව භාවිතා කරනවා යන්න පමණයි.  

 

5 නිතරම තමා ආයතනයෙන් අස් වී යන බව පැවසීම

සමහර සේවකයන් ඉන්නවා ආයතනයට රිදවන්නට, තමාගේ ඉල්ලීම් දිනා ගැනීමට තමා ආයතනයෙන් අස් වී යන බව නිතරම කියන. ඔබට ඔබේ ආයතනය නොගැලපෙන්නේ නම් ඇත්තටම අස් වී යාම වරදක් නෙවෙයි. හැබැයි බොරුවට “මම අස් වෙනවා.” කියමින් සිටීම හානි පමුණුවන්නේ ඔබටමයි. එයින් ඔබේ කාර්යාලිය සගයන්ගේත්, ඔබේ ආයතන ප්‍රධානියාගේත් අප්‍රසාදය ඔබ වෙත හිමි විය හැකියි. ඒ වගේම නව සේවකයෙකුව ඔබ වෙනුවෙන් වැඩට අරගෙන, ඔබට අස් වී යන්න යැයි ආයතනයෙන්ම දැනුම් දේවි.

 

6 ඔබේ දුක කියමින් වැටුප් වැඩි කරන මෙන් ඉල්ලීම

ඔබට ඔබේ වැටුප් වැඩි කර දෙන ඉල්ලීමට අයිතියක් තියෙනවා. හැබැයි ඒ ඔබේ ඵලදායිතාවය පෙන්නුම් කරලයි. ඔබ වසරක් තුල ආයතනයට ලබා දුන් ඉහල ඵලදායිතාවය, ඔබේ සුවිශේෂී හැකියාවන්, ඔබ මෑතකදී ලබා ගත් අධ්‍යාපන සුදුසුකම් ගැන සඳහන් කරලා වැටුප් වැඩි කර දෙන මෙන් ඉල්ලීම නම් සුදුසුයි. ඒ වෙනුවට ඔබේ ගෙදර ප්‍රශ්න ගැන පවසමින්, ඔබට ඇති මුදල් අවශ්‍යතා ගැන පවසමින් වැටුප් වැඩි කර දෙන මෙන් ඉල්ලීම නුසුදුසුයි.  


SHARE